KİMM-in əməkdaşları “FDC Summit 2025” tədbirində və OIC-CERT təşkilatının idarə heyətinin iclasında iştirak etmişdir

Xüsusi Rabitə və İnformasiya Təhlükəsizliyi Dövlət Xidmətinin Kompüter İnsidentlərinə Qarşı Mübarizə Mərkəzinin əməkdaşları Misir Ərəb Respublikasının Milli Telekommunikasiya Tənzimləmə Orqanının (NTRA) təşkilatçılığı ilə 28-30 aprel tarixlərində Qairə şəhərində keçirilmiş “FDC Summit 2025” tədbirində və İslam Əməkdaşlıq Təşkilatının Kompüter İnsidentlərinə qarşı Mübarizə Mərkəzlərinin birliyi olan OIC-CERT təşkilatının idarə heyətinin 2025-ci il üzrə ikinci iclasında iştirak etmişdir.

“FDC Summit 2025” tədbiri çərçivəsində keçirilən OIC-CERT təşkilatının idarə heyətinin iclası zamanı icmanın 2025-ci il üzrə olan fəaliyyət dövrü ərzində ölkəmizi təmsil edən Kompüter İnsidentlərinə Qarşı Mübarizə Mərkəzinin öhdəsinə götürdüyü tapşırıqlar haqqında məlumat verilmişdir. Mərkəz tərəfindən davam etdirilməkdə olan mühüm tədbirlərdən biri də OIC-CERT-in Üzvlük Portalının tərtibatıdır və iclas zamanı nümayəndələrimiz yeni portalın ilkin təqdimatını həyata keçirmişdir.

30 aprel tarixində tədbir çərçivəsində keçirilən “Research Forum”-da Murad Balayev “Bir klikin pərdəarxası: sosial mühəndislik milli təhlükəsizlik riski kimi” mövzusunda keçirilən panel müzakirəsində spiker qismində iştirak etmiş və Azərbaycan Dövlət CERT-inin təcrübələrindən geniş bəhs etmişdir.